المنظورات الحسينية - الجزء الرابع

المنظورات الحسينية ـ 4

119

هالعلم تأسيس البناء المختار		شيد قوامه
هالعلم من سالم يمين الكرار		إتقدس مقامه
وإنذخر من حيدر الشبله المغوار		بإسم ألإمامه

بيد ابو فاضل عله

وأخذ يوم إبكربله

علم زود الماضين

ينـّشر بإسم الدين

بيد أبو فاضل علم
* * *

هالعلم ياما رفرف إبحد إخدور		ما إلها ثاني
هالعلم بإسم الله ورسوله منصور		إو سبع المثـاني
هذا العلم ما ينطوي النفخ الصور		حارز معاني

هالعلم من نشأته

وإلإراده سجلته

يرتفـع بالدارين

ينشر بإسم الدين

بيد أبو فاضل علم
* * *

(تمت)

المنظورات الحسينية ـ 4

120

(28)

قمر بني هاشم العباس عليه السلام

«ميمر مذيل»

ياگمر هـاشم

من طحت عالشاطي

لا ظل خـدر لا ظل حمه اولا صيوان

من طحت عالشاطي

* * *

دگعد يمن بحماك محمل زينب		من طلع من داره
مهيوب چان ابهيبتك يمهذب		اوهيبتك قهاره
اورتبت خدري ابكربلا يمرتب		واضربت لي استاره

خـدر البنيته

من طحت عالشاطي

من عگب نـورك وجرت بي نيران

من طحت عالشاطي

* * *

موش آنه زينب يالجبتني بحماك		من أرض المدينه
هـاك أخذ عتبي اوخل يفت عتبي احشاك		واتهيج ونينه
ريتك عدل واتشوف حالي ابعيناك		يا حامي الضعينه

أرعـه ابحرمكم

من طحت عالشاطي

والدار وحشه وخاليه امن الوليان

من طحت عالشاطي

* * *

ليلة الحادي عشر سهرت عيني		للشريعه اربيه
أنحب وانادي بالذي اتحاميني		وينك هالمسيه
اشمـا صحت ماغير الصده اينابيني		وانته اعله الوطيه

واعيوني ظلت

من طحت عالشاطي

مسهره اوگلبي اوياكم اعله التربـان

من طحت عالشاطي

* * *

المنظورات الحسينية ـ 4

121

چن گمرهاشم ناده يختي اتعتبين		والعتب ياذيني
بالعمد راسي منفضخ ما تدرين		ريتچ اتشوفيني
لا مهجه عنـدي اولا يسار اوليمين		والسهم صك عيني

لاچن اخبرچ

من طحت عالشاطي

عالغبره جسمي او گلبي عد خدرچ چان

من طحت عالشاطي

* * *

ادري ابعينچ على الشاطـي اربيه		او روحچ اتباريني
وايلوج گلبچ من اصواب البيه		يختي اوتناديني
أدريچ تمشين ابيسر مسبيه		اوگصدچ اتودعيني

ودعتچ الله

من طحت عالشاطي

اوعينچ تراني ما خنت دهري إلخان

من طحت عالشاطي

* * *

ليلة افراگك حاربت عيني النوم		والدمع يتجاره
او روحي يبو فاضل على الشاطي اتحوم		واترد لليساره
اتباري الأرامل والعليل المالوم		والگلب بي ناره

نـار البگلبي

من طحت عالشاطي

تنطفي او تسعر من حنين الرضعان

من طحت عالشاطي

* * *

چن الصده امن المشرعه ايناديها		يختى اتشجعيني
تدرين بچفوفي العده امگطعيها		يختي اوتحشميني
اوللحرم عگبي رادتي اتباريها		يختي اوتكفيني

عالحرم چـانت

من طحت عالشاطي

وياچ روحي هايمه ابهالوديان

من طحت عالشاطي

* * *

المنظورات الحسينية ـ 4

122

عباس آنه الشلت إبوجودك راسي		إوهيبتك رفع الراس
زينب أنه البيك إچسبت نوماسي		وإنته راعـي النوماس
ما چنت أظن بالدهر يكسر باسي		والهظم كسر الباس

إو گوس المنـايه

من طحت عالشاطي

نيشن سهم وإبگلبي طاح النيشان

من طحت عالشاطي

* * *

(تمت)

المنظورات الحسينية ـ 4

123

(29)

عتاب الحوراء عليها السلام

«ميمر مذيل»

من طاحت إچفوفك وگف حد الزود		وإنگطع بينه
إو سهم البعينك أشد من سهم الجود		أثر علينه
لاچن يبو فاضل إصواب العامود		هيأ سبينه

چانت إعيالك بالخيم وبرجواك		تروي ظماها
وأعلم إبسيف الگطع منك يمناك		گطع رجاها
بس حرم ظلينه إو نخبرك بعداك		ظهرت إعداها

المنظورات الحسينية ـ 4

124

من طحت وإتهدم الخدر المرصود		چـان إبحياتك
فرهود صاحو بالمخيم فرهود		فرّن خواتك
هاك إخذ ونة حزن گلبي الممرود		لمخدراتك

إو ليلة الحادي عشر ما تدري إشصار		وإشجره إبحالي
لا خيمه عدنه إو لا چفيل إو لا دار		إو لا عدنه والي
فوگ الضرب فوگ النهب فوگ النار		جور الليالي

وإشلون صبحية كدر صبّحنه		بالغاضريه
گيدونه بحبال اليسر والمحنه		وإنتو رميه
إو عنكم ينابينه الصده لو صحنه		يهـل الحميه

المنظورات الحسينية ـ 4

125

إو عالنوگ بس إجسومنه مشبوحه		راحت يساره
إو أرواحنه إويه إجسومكم مطروحـه		إبوسط المعاره
وإگلوبنه إمن إسهامكم مجروحـه		إو دمها إيتجاره

سار السبي وإعله الجثث مرينه		والدمع ساجم
والروس بطراف الجِنه إتنادينه		إو ترعـه الفواطم
صدت وداع إعله النهر صدينه		يا گمر هاشم

وإتحيرت بعيـالك إو غربتها		وإنهدم حيلي
وأرعه إبيتاماكم وأرد لهفتها		إو ما نمت ليلي
ونَّت عليلك ثگلت ونّتها		إو فجعت دليلي

المنظورات الحسينية ـ 4

126

وإشلون طبه طب سبينه إلكـوفه		يكسر الخاطر
إسهام الشماته بالرمي معروفه		تعمي النواظر
والشامت إبن إزياد والمجتوفه		إگباله الحراير

والشام آه الشام من طبـت الشام		فاضت إجروحي
وإعيال مسبيه وأرامل وأيتام		ثگلت نوحي
ألله من جور الدهر وألأيام		مرمرت روحي

(تمت)

المنظورات الحسينية ـ 4

127

(30)

زينب تشاهد المصرع

«ميمر مذيل»

دگعد إو زم الرايه يا راعيها		زينب تنادي
حرگو خيمنه إو منهو ايطفيها		زينب تنادي

* * *

زينب على التل أوچبت وإتنادي		وين الضيـاغم
رجنت إبحنها والنحيب الوادي		والدمع ساجم
وين التحامي إمخدرات الهادي		وين الهواشم
وين إخوتي إلما يندرس ماضيها		زينب تنادي

* * *

إشما حشمت ما واحد من إخوتها		مسرع لفاها
عونچ يلبيها إو يرد لهفتها		إو يبطل بچاها
للمعركه إتعنت تهل دمعتها		إومعلن نداها
وإمنين إجتنه كربله إو واديها		زينب تنادي

* * *

حنت إو شبچت عله الراس العشره		إبوسط المعاره
وتجلب إجسوم الخذم عالغبره		دمها إيتجاره
وتنادي وينك يا عزيز الزهره		ما تم لي چاره
يحسين دگعد لختك إو حاچيها		زينب تنادي

* * *

المنظورات الحسينية ـ 4

128

من شاهدت جسم الحسين إموذر		وذرةٍ وذره
إبحد الصوارم وبدماه إمعفر		مهجة الزهره
وصدره إبحوافر خيل أُميه إمكسر		صاحت إبعبره
يحسين ليش الجثتك إمگطعيها		زينب تنادي

* * *

طاحت عله جسمه تحبه إبنحره		إو گطعت الظنه
شاهدت دم طبره يكت إبطبره		أيّست منه
ودعتك ألله يا چتيل العبره		صاحت إبونه
يحسين عيني إمن البچه لعميها		زينب تنادي

* * *

إتنادي يخويه وبالترب تتواره		بيك أفجعوني
يا ريع گلبي إو يا نمير أثماره		يا ضوه إعيوني
إبديرة غرب وبهالحرم محتاره		لا تخلوني
ما تنتهض لعيالك إتحاميها		زينب تنادي

* * *

يحسين أحلفك بالرسول إو صهره		وبدمه عيني
كلمني إبجاه البتول الزهره		وإسمع ونيني
نادها يختي إجروح بيّه كثره		لا تعتبيني
جاعد من إبدي حالتي وأشچيها		زينب تنادي

* * *

المنظورات الحسينية ـ 4

129

صدت لعد شاطي الفرات إو طاحت		فوگ الوطيه
تحن إو نون إو بالتراب إتوارت		بنت الزچيه
لحد يحداي الضعينه صاحت		رحت إمن إديه
ظلت حرمكم شتت يا واليها		زينب تنادي

* * *

عباس منهو غيرك إتكفلني		يا شبل حيدر
طول الدرب باراني ومدللني		إو بي گلبي يستر
ومنهو الـذي إيرچبني وينزلني		وبالضعن يزهر
عيناچ يختي دعوتي إتلبيها		زينب تنادي

* * *

إنته إرفعت لي بالطفوف الصيوان		وإضربت خدره
دگعد إو شوف اليوم بيه النيران		ظلت مسعره
عگب الخدر زينب إبولية عدوان		والحرم يسره
شوف الدهر بيه إشعمل تاليها		زينب تنادي

* * *

ودعتك ألله يا گطيع الچفين		جسمك زهينه
إبنومك تهنه وإحنه عنك ماشين		غصبا علينا
لو حده الحادي الوجه ما ندري وين		وإمچتفينه
وإضعونّه روس إخوتي إتباريها		زينب تنادي

* * *

(تمت)

المنظورات الحسينية ـ 4

130

(31)

الشبل من ذاك ألأسد

«ميمر »

رايتك عگبك بالشرف علاها

شبلك يحيدر

واسرار ميدانك حفظ معنـاها

شبلك يحيدر

* * *

شبل الذخرتـه الكربلا إيواسي حسين		بادر ابرايه والبصيره ابرايه
واذخرت رايه او بيها تأييد الدين		والنعم رايه وإعتلت هالرايه
ابرايتك وابنك ياعلي گر العين		والرايه آيه وإبيمين الآيه
والآيتين ابصارمه يتلاها		شبلك يحيدر

* * *

والكون من يعبس إعليها ايهلهل		منك ارسومه اومثلك برسومه
ومن العرين يهيج ليث ومشبل		عنـدك اعلومه او ما تضيع اعلومه
صل ايتلوه او نفج من غاره الصل		واطلگ الحومه وشعل نار الحومه
ونار الشعلها ابآتك طفاها		شبلك يحيدر

* * *

لو مال مهره اعله الحرايب مالت		دوبحت وأگفت وأگفه حظ الأگفت
من يذب مهره اعله الملازم شالت		عن وجهه صدت ما ترد لوصدت
لو زرگ رمحه اعله الچمين انهالت		والحزم طشت سيفه لم الطشت
عالعالي ذب السافل او واطاها		شبلك يحيدر

* * *

المنظورات الحسينية ـ 4

131

شد عالجمع عزمـه اوتفرس گلبه		اوعالجمع دمدم بي سخط من دمدم
كفت مداريع الزلم عن حربه		والحرب دلهم بي زهر من دلهم
والشارد أعمه اوما يوچد دربه		والثبت أسلم والشرد ما يسلم
انجوم الضحه الشوس الحرب		راواها شبلك يحيدر

* * *

من يدك مهره اتـروط من حدره الگاع		والزلم تفزع والمهر ما يفزع
من يكد ما يمتنع من كل مناع		اوميصرعه مصرع يسحك التتصرع
خياله نيص الختله ويجفل اسباع		والرمح مشلع والزلم تتشلع
اشما خبط رمحه ابصارمه صفاها		شبلك يحيدر

* * *

عساله يخبط واليصفي البتار		ابشدة الساعد والفعل للساعد
او سهمه السمندل من المدفع لو طـار		للفلك صاعد والشرار الصاعد
اوصوته الشهاب الثاقب اليسگط نار		يحرج المارد وين ملجه المارد
من احروبك اشما حفظ ما ينساها		شبلك يحيدر

* * *

من سخط بالمارد شهاب الثاقب		واسعرت ناره او حمه الكـون ابناره
وجهه ايتشعشع والمهند لاهب		تجدح اشفاره او ماضيات اشفاره
ضنوتك مثلك غالب الكل غالب		منك اسراره اوغامضات اسراره
او بالطاويه رد للخيم يتباها		شبلك يحيدر

* * *

المنظورات الحسينية ـ 4

132

والطاويه الما تنوصف معناها		نعم الخياله اوتعجب الخياله
المارد بطحها من الحسن واخفاها		الساعة أهواله او حين وافه أهواله
ما إغتنم منها اوغانمه خلاها		اوفسدت اعماله ولاگه سوء اعماله
ابطف كربلا والطاويه اتعلاها		شبلك يحيدر

* * *

عدل على الگوم او نزل چالزلزال		الكون ايتزلزل وهو ما يتزلزل
راسخ ومن زوده الصواعق تنهال		وبريبه بدل للعزايم بدل
ويشيل ثگل الوغه ابطـرف العسال		لوعمد يفعل راجح اشما يفعل
ذل عزة الشوس او سلب سطواها		شبلك يحيدر

* * *

لوكبر اجبال الحرب منه اتميد		ما يظل ثابت غير جدمه الثابت
وخله الحروب البالحرايب صنديد		للهيبه صـامت والمصيت صامت
اومن يرتجز يخنس من الكون الويد		بالنظر لافت للمنايه إيلافت
اوبيهود خيبر عملتك سواها		شبلك يحيدر

* * *

(تمت)

المنظورات الحسينية ـ 4

«فائزي مذيل»

يا صاح لو ضاگ الامر لا تمد إيدك		للما يفيدك
واصبر اوبالله اعتصم لا تلوي جيدك		للما يفيدك
لا تلتجي اولا تشتچي هم اليچيدك		للما يفيدك

ودع الباري إبقدرته كنز المچارم

عد گمر هاشم

ودع رحمته الواسعه إلتغني الوادم

عد گمر هاشم

يا صاحب الحاجه إعتني إو تلگه المغانم