م . هـ . هـ . هـ (**)
1 ـ اصد وانظر ابيـوت الحرم لابيت
2 ـ فـرَّت بالفـلـه والـروح لابيت
3 ـ لـعند اوصـيتك يحسـين لابيت
4 ـ او جمعت الحرم برض الغاضريه
هـ . هـ . م . هـ(**)
1 ـ اگضي بالحزن يـومي وبيته
2 ـ إوعفت عيش العله الذلة وبيته
3 ـ شال احسـين عن داره وبيته
4 ـ ابليل اظلم گصـد للغاضريه
هزج(**)
1 ـ أنام اعلـه الجمر لـيلـي وبيته
2 ـ إو رفضت الفرح كل عمري وبيته
3 ـ علـه الفارگ وطـن جده وبيته
4 ـ او تعنـه الـتربتـه بالغاضريه
هزج(**)
1 ـ رفضت الفرح من بعدك وبيته
2 ـ او لگضي بالحزن ليلي وبيته
3 ـ علـه اللي فارگ اعياله وبيته
4 ـ اخـوي احسين ما يرجع عليه
هـ . هـ . هـ . م(**)
1 ـ يبو اليمه اشكثر منك تراجيت
2 ـ او گلتلك نار المخيم تراجيت
3 ـ يخويه لا تظن وحدي تراجيت
4 ـ ويه الحرم اعرضلك شچيَّـه
م . م . هـ . هـ(**)
1 ـ بغض لهلي الدنيه اوياي لاجيت
2 ـ رمتني ابسهم منه الروح لاجيت
3 ـ عساني الكربله ابهالسفر لاجيت
4 ـ ولا راحوا هلي من بين اديـه
هـ . م . هـ . م(**)
1 ـ يبـويه شعـوگك عني ولاجيت
2 ـ الـدنيا بعينهـا بانت ولا جيت
3 ـ يبويه انهضمت اعيالك ولاجيت
4 ـ ابين الگـوم تـتـلاعـه سبيّه
هزج(**)
1 ـ دمعتـي احمـرت ابعيني ولا جيت
2 ـ عله الهامت ابوادي الطف ولا جيت
3 ـ تصيح اعتب يبـو الحمله ولا جيت
4 ـ تحـامـينـي وترد اخـيـول اميَّه
هزج(**)
1 ـ إشكثر أدعيت لك تسلم وناجيت
2 ـ اشـو ظليت عالـغبره وناجيت
3 ـ لون أسلمت يـولـيدي وناجيت
4 ـ حييت اسم النبي اوحيدر وصيَّه
هزج(**)
1 ـ ابدمع عيني حفرت الوجن وشجيت
2 ـ وبعض وني يفت الصخر وشجيت
3 ـ يمحمد يخـويـه جيت وشـجيت
4 ـ بـلا ولـيان أون وأصفـج بديه
هزج(**)
1 ـ اشمالك يا دهـر حاربت وبچيت
2 ـ وانه ابداري خدم جبريل وبچيت
3 ـ خيالي ما يرا كل شخص وبچيت
4 ـ دمـه الفگد اخـوتي بالغاضريه
هزج(**)
1 ـ لسـاني يلهج بإسـمك ورديت
2 ـ أو عساني مثلك اتوذر ورديت
3 ـ اجيتك للـنهر انحـب وردّيت
4 ـ خفت لن النهـر يشـتمت بيه
م . هـ . هـ . هـ (**)
1 ـ لبـو جاسم اكـتاب العتب وديت
2 ـ امحمد تحضـر الخـوان وديت
3 ـ اوگفت انته ابحرب صفين وديت
4 ـ العليك اوغـبت عـن الغاضريه
هزج(**)
1 ـ اشـمالك يا گـلب خزنت وديت
2 ـ سلامي الصوب ابو السجاد وديت
3 ـ اريد ابچي وگـل للمحـب وديت
4 ـ غـريب الدار دبچـي ابها لعزيَّه
هـ . هـ . م . هـ (**)
1ـ آجْدامِيْ مِنْ مَسيرِ الزَّمِلْ بارَيتْ
2ـ اوْ لَطْفالَكْ يَبـْوَ السَّجّادْ بارَيتْ
3ـ يَخْوَيَهْ لِوَنْ بِيَـهْ مَرَضْ بارَيتْ
4ـ لاچَنْ غُصَصْ تِتْراكَـمْ عَلَيَّـه
هزج (**)
1ـ يَخْـويَـه تِعْلَم ِآبْحالـي وَدْارَيتْ
2ـ غَرْيبَه وتِسْفَحِ آدْمـوعي وَدْارَيتْ
3ـ حِرِتْ بَين احْرِسْ ايْتامَكْ وَدْارَيْت
4ـ وبَين ِ اشْـمـاتَـةِ الْـعِدوانْ بِيَّه
ر . م . م . هـ (**)
1ـ بَسْ ماطِحِتْ بِيَّـه آلأرِضْ مارَيتْ
2ـ إوْ عُگْبَكْ ماآبْشُرْبِ آلْعَذِبْ مارَيتْ
3ـ يَخويَه آحْسَينْ يومِ آعْلَيك ْ مارَيتْ
4ـ إوْشِـفْتَكْ مِنْچِفِـي شِـفْتِ آلْمِنِيَّه
|
