1 ـ عيني بالفله ينعاك وحشه 2 ـ إمصابك ما دعالي گلب وحشه 3 ـ يابن أمي لگيت الدار وحشه 4 ـ عگب ما چانت إبنورك زهيه
1 ـ گلبي ما زماني إبونس نعشه 2 ـ تركني إبحزن وأرعه إبنات نعشه 3 ـ عله الماشالت ألأحباب نعشه 3 ـ إنشال إبباريه سوده عليه
1 ـ مثل إمصاب أبو السجاد ما مش 2 ـ إو لمصابه يكت الدمع ما مش 3 ـ لون زرته عله الرجلين ما مش 4 ـ عالراس المشي للغاضريه
1 ـ سند ما سند دولتهم ولا مناص 2 ـ وجب تفجير هالثوره ولا مناص 3 ـ السكوت إعله العدو الغاشم ولا مناص 4 ـ مثل خرط القتاد أصبح عليه
1 ـ يحگلي لو أشگ الثوب بالنص 2 ـ دُفگ دمعي إو تساوه العلو بالنص 3 ـ من الباري چتلة حسين بالنص 4 ـ يموت إو يندفن بالغاضريه
1 ـ وحگ الباري وكتابه ونصه 2 ـ تولاني الدهر علوه ونصه 3 ـ وأنه الكثر من ثلث عمري ونصه 4 ـ إنگضه إبخدمة شهيد الغاضريه
1 ـ أگول أو يسمع العجلان والراض 2 ـ إو ميهمني الغاضب علي والراض 3 ـ ملعون اليعادي حسين والراض 4 ـ جسمه إلچان مرمي إعله الوطيه
1 ـ يهاشم من عتابي الصخر ينغاض 2 ـ أو لون يسمعني صاحب ثار ينغاض 3 ـ عجيبه النظر عن حسين ينغاض 4 ـ إو هدر دمه يروح إبسيف أميه
1 ـ إبحزن گلبي إنشحن ما لاش منفاض 2 ـ يا هو إللي يلوم الدمع منفاض 3 ـ لوّن همي عله أهل الخلد منفاض 4 ـ غدت نيران هالجنه الهُويه
1 ـ متون النايبه أگدر أرضها 2 ـ ولا أگدر للسمه إلتنشد أرضها 3 ـ أبو السجاد متوسد أرضها 4 ـ لو كيوان طاح إمن الثريه
1 ـ حب حسين مثل الصوم فرضه 2 ـ وإللي ما يحبه رجس فرضه 3 ـ وإنته يالمحب إبهاي فرضه 4 ـ توفيقك من الباري هديه
1 ـ إگلوب إللي تضد حسين مرضه 2 ـ إو عيشه إبغير حبه أبد مرضه 3 ـ عمر بن سعد صدر حسين مرضه 4 ـ رضّه إللي كسر ضلع الزچيه
1 ـ روحي بيش أسليها ورضها 2 ـ فگدكم نحّل إعظامي ورضها 3 ـ إبدماكم كربله إبتلت ورضها 4 ـ ألسبب ما تبل دمعي الغاضريه
1 ـ متى إتهلهل الغيد السمر والبيض 2 ـ إو تتخالف إرماح السمر والبيض 3 ـ إو تسمع من رنين الطوس والبيض 4 ـ نفخ الصور بأرض الغاضريه
|
